Nuliara toqunikuuvoq

Nuliara ukiut arfineq-pingasut matuma siorna ajutoornikkut toquvoq. Ajutoornerup kingorna siniinnalerpoq, ullullu qulit peruluttut inaaneereersoq panigut marluk peqatigalugit najuuffigisannik anersaartuutaa qaminneqarpoq.


Tamanna qaangernikuunngisaannarpara, aamma akuttunngitsumik eqqarsaatikkut suut tamaasa misigeqqittutut ittarpakka. Ajutoorfigisimasaa akuttunngitsumik aqqusaartarpara.


Tarnip pissusiinik ilisimasalimmik oqaloqatiginnittaqattaarnikuuvunga, tamannali angerlarsimaffinnit allamut nikittarnerup saniatigut allamik pissarsiffiginagu isumaqarpunga.


Maanna 85-inik ukioqarpunga, sulilu nuliaralu najugaqarfigisimasatsinni najugaqarlunga.


Akissut

Asasara illit,


 


Qujanaq uagutsinnut ikiortissarsioravit. Nuliavit ajutoornikkut annaasimanera pillugu misiginneqatigivakkit. Misigisaq sakkortoorujussuaq misigisimagit paasinarpoq, aamma nuliavit annaanera suli eqqarsaatinni inuuninnilu initoorujussuusoq paasilluarpakkit.


Misigissutsitit ilisarisinnaavakka, uanga nammineq ajutoornikkut aamma annaasaqarnikuugama. Inuuneq isumaqanngitsutut piviusuunngitsutullu misigisimanarsinnaavoq. Toqusoqarneratigut annaasaqarsimasugut aliasunneq inuunitta sinnerani pigissavarput.


 


Tarnip pissusiinik ilisimasalimmik oqaloqateqartarninni misigisimanerit pillugu nassuiaatinnut assingusumik uanga aamma misigisimanikuuvunga; isumassaqartitsinnginnermik misigisimaneq. Sooq aamma toqu pillugu oqaluuserinnissaanga? Tamatuma oqaluuserineratigut isumassaqartitsinnginnermik misigisimaneq qanoq ililluni piissagami? Tarnip pissusiinik ilisimallip ataatsip oqaluttuuppaanga, oqaluuserineratigut qarasaq sianiinaarneqartartoq. Annaasaq pillugu eqqaamasat annertunerujartortillugit “pisut aqussinnaanerannik” qarasaq isumaqalersillugu sianiinaarneqarsinnaanera annertunerulersarpoq. Tamannalu qaratsamik eqqissisitsisarpoq. Tarnilli pissusiinik ilisimasalimmit ikiorneqarnera uanga pitsaanerulissutiginngilara, taamaattumillu oqaloqatigiittartoqatigiinnut peqataaniarlunga nalunaarpunga, allat aamma annaasaqarsimasut naapikkusullugit. Misiliiguma suna annaassagakku? Assigiinngitsut pissutigalugit toqusoqarneratigut annaasaqarsimasut unnuk taanna naapippakka, aliasunneralu assinganik misigisaqarsimasunut oqaluttuarisinnaagakku uannut pissarsissutaaqaaq. Aliasunneq initutinneqarnissaminut periarfissinneqarmat tamanna uannut iluaqutaavoq, aamma annaasannut tunngatillugu kiserliornera annikinnerulersutut misigisimanarluni. Annaasimasara pillugu, aamma aliasunnermut atatillugu misigissutsikka pillugit unnuk taanna kiserliortutut misigisimanngilanga. Allat uattulli misigisimasut misigalugu, aamma toqusoqarneratigut aliasuuteqartut allat misilittagaat ilinniarfigalugit, kiisalu annaasaqarnertik inuunerminni qanoq atorneraat artorsarfinni siunnersuutinik uannut tunisivoq, aamma annaasaqarnerup inuunermut qanoq ilaatinnissaannut isiginninnernik assigiinngitsunik uannut takunniffiulluni.


 


Neriuppunga akissutiga atorsinnaassagit. Uagutsinnut allaqqinnissannut tikilluaqqusaasorujussuuvutit.


 


Ajunnginnerpaamik kissaallutit, kajumissutsimik suleqataasut ilaat


 


Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.


Ikiortissat allat uani takukkit: https://aliasoqatit.gl/ikiortissanik-allanik-nassaarit/


Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/