Ikinngutiga toquvoq
Ikinngutiginerpaasara qaammat kingulleq imminut toquppoq. Siornatigut toqusoqarneratigut annaasaqarneq misiginikuunngisaannarpara, taamaattumik aliasunnera qanoq iliuuseqarfigissallugu nalornisorujussuuvunga. Ulloq naallugu eqqarsaatigisarpara, aammalu misigisimallunga qanigisama tamanna paasisinnaanngikkaat. Timiga oqimaatsutut misigisimajuaannarpara, aammalu ulluinnarni inuunera ingerlateqqinneq ajulerlugu. Aliasunnera ulluinnanni initungaarmat ikinngutaalluarunnaartutut ilaqutaalluarunnaartutullu misigisimavunga. Sunnguamilluunniit iliuuseqarnissara, soorlu nerinissara sininnissaraluunniit ajornakusoortilerpakka. Suut tamarmik unikkallarnissaat kisiat kissaatigalugu. Nukissaqanngitsutut misigisimagaanni ulluinnaat qanoq ingerlanneqaqqilersinnaappat.
Akissut
Asasara illit,
Ikinngutiginerpaasat imminut toqussimasoq tusarlugu ajuusaartorujussuuvunga, misiginneqatigivakkit. Imminut toquttoqarneratigut annaasaqarneq qanoq misigisimanarnersoq ilisimavara, aamma tamanna qanoq artornartigalunilu sakkortutiginersoq oqaasertaleruminaatsuuvoq. Uanga nukara imminut toqunneratigut annaanikuuara, assullu sakkortunaarnikuullugu. Isumaqarsimanngikkaluarpunga pilluarneq naneqqissinnaassallugu. Timikkut tarnikkullu ulluni arlalinni, sapaatit akunnerini, qaammatini arlalinni ulloq naavillugu qasusorujussuusarsimavunga. Ullut ilai oqinnerumaartarput, ullullu ilai artornartarlutik. Inuuninni qanoq ingerlariaqqissanerlunga taamanikkut aamma ilisimasimanngilara.
Aliasunnerup ingerlanera inummiit inummut assigiinngitsorujussuusinnaavoq, taamaattumik suna pisariaqartinnerlugu paasiniarlugu imminut naalaarnissaq pingaaruteqartorujussuuvoq. Uanga taamaanikkut kisimiittorujussuartut misigisimavunga, naak taamaannanga nalunngikkaluarlugu. Suna pisariaqartinnerlugu piffissap ingerlanerani paasiartulerpara, tassalu nukkama qaninnissaa, pisarnitsitullu suna tamaat oqaloqatigiissutigalugu. Tamatuma kingorna allakkanik amerlasoorpassuarnik allaffigisarpara, nipituumillu imminut atuffattarlunga. Allakkat ilai ulluma qanoq ingerlasimaneranut taamaallaat tunngassuteqartarput, ilaalu peqatigiilluta suut misigisimanerivut pillugit imaqartarlutik, aamma ilaannikkut allaannartarpunga hej.
Ilisimassavat aliasunnerpit ingerlarnga maanna nalaatat nalinginnaasuulluinnarmat, aamma massakkut sumi inissisimanerit ilisarisinnaallugulu paasilluinnarsinnaavara. Misiginneqatiginninnera oqaatigeqqissavara.
Nuummi najugaqaruit Aliasoqatini kajumissutsiminnik suleqataasut Illorpumi ulloq 21. aggusti nal. 19:00-imiit 21:00-ip tungaanut naapeqatigiissitsissapput. Aamma toqusoqarsimatillugu aliasuuteqarneq pillugu chatti marlunngorit tamaasa ammasarpoq – kajumissutsiminik suleqataasumik tassani chatteqateqarsinnaavutit – aamma tamatta annaasaqarluta nammineq misiginikuuarput. Aliasoqatit neqerooruutai pillugit annertunerusumik uani paasisaqarsinnaavutit: https://aliasoqatit.gl/da/sorgstoette/
Peqataanissannut tikilluaqqusaasorujussuuvutit, aammalu toqusoqarneratigut annaasaqarsimasunik allanik naapitsillutit, aamma uagutsinnut allaqqissinnaavutit.
Inussiarnersumik inuulluaqqusilluta
Aliasoqatini kajumissutsiminnik suleqataasut