Asasara illit

Ataatavit annaanera atuarlugu ajuusaarpunga. Misigisimasat tupannarsimasorujussuartut ippasippoq, aamma taama pisoqarnissaa illit piareersimaffiginngilluinnarsimallugu. Tamanna sakkortoorujussuuvoq, aamma ilisimaginngisamik annaasaqaraanni tamanna amerlanerpaanit piviusuunngitsutut, paasiuminaatsutut aamma upperiuminaatsutut misigisimaneqassaaq. Illit ataatavit annaaneranit qaammatip aappaa avillugu taamaallaat qaangiuppoq, aamma pisoq taamaattoq piffissami sivisuumi paasiuminaatsinneqarsinnaavoq. Isumaqarpunga ataatassi toqunerata kingorna illit qatanngutivillu takusimagassiuk pitsaasuusoq. Annaasap paasinissaanut tamanna iluaqutaasinnaasarpoq, naak massakkorpiaq artornartorujussuartut misigisimanaraluartoq.

Uanga ataataga aamma annaanikuuara, ilisereernittalu kingorna qanoq qasoqqatigalunga eqqaamavara, ilutigitilluguli aliasungaarama sininnaveerujussuartarlunga. Tamatuma kingunerisaanik ilinniarninnik aallussisinnaarpianngilanga. Aliasunneq inissaqartinneqarlunilu piffissaqarfigineqassaaq, ilutigitilluguli uannut pingaartoq tassaasimavoq uivernerujussuup nalaani atuarfimma aalajangersimasumik tulaavigisinnaanissaa, taamaattumillu piumassusera tamakkerlugu atuarlunga. Qujanartumik sinittarnera, nukissakka aamma nukissaqarfiginninnera arriitsumik pitsanngoriartorput.

Oqaatigerusutannik qanoq annissuisalersinnaanerlutit apeqqutigivat? Takorloorpara eqqarsaatikkut misigissutsikkullu paatsiveerusimaarnermiittutit, taakkulu inissaqartinnissai paasinissaalu ajornakusoortissimassallugu. Ilisimavarput aliasunneq kiserliornarsinnaasoq, aamma eqqarsaatit misigissutsillu allanut oqaluttuarisinnaanerat oqilisaataasinnaasorujussuusoq. Aamma oqaasertaliineq paasinninnissamut iluaqutaasinnavoq. Qujanarpoq angajullernik qatannguteqaravit, neriuppungalu taakku oqaloqatigisinnaagitit.

Aamma Aliasoqatini aliasuuteqarneq pillugu Apeqqutit Akissutillu aqqutigalugu allaffigigatsigut pitsaasuuvoq, uagut akissuteqartartuusugut annaasaqarnermik nammineq misilittagaqartuuvugut, taamaattumillu paasisinnaallutit. Uagutsinnut allaqqinnissannut tikilluaqqusaajuaannarputit.

Qassinik ukioqanersutit naluara, kisianni 13-it sinnerlugit ukioqaruit toqusoqarneratigut aliasuuteqarneq pillugu onlinekkut naapeqatigiissitsinermut peqataasinnaavutit, tassani toqusoqarneratigut qimagaasimasut allat naapissinnaallugillu tusarnaarsinnaavatit, aamma kajumissuseqarfigissagukku ataatavit annaanerani illit nammineq misigisatit oqaluuserisinnaavatit. Onlinekkut tullianik naapeqatigiissitsinissaaq pissaaq ulloq 17.01.24, nal. 19, tassanilu sammineqassaaq Aliasunneq ikinngutillu.

Aliasoqatit neqeroorutaat annertunerusumik uani paasisaqarfigisinnaavatit: https://aliasoqatit.gl/da/sorgstoette/ aamma piffissami aggersumi naapeqatigiissitsisarnissanut allattorsimaffik uani takusinnaallugu: https://aliasoqatit.gl/da/cafeaftner/

Ajunnginnerpaamik kissaassilluta,

Aliasoqatit