Amerlavallaartut toqupput
Arlalippassuarnik aliasuuteqarneq qanoq suliarineqarsinnaava?
Uima ningaava 2017-imi upernaakkut toqujartorpoq, uagullu qanilluinnartumik malinnaavugut. Kingorna ikinngutikka uannut qanilluinnartut marluk, angajoqqaakka illugiillutik, uima anaanaa aamma qatanngutiga angut toqupput.
Nappaat ilungersunartoq, aammalu sisamariarluni nuunnerit isumagisariallit akuupput. Kiisalu coronamik ajornartorsiuteqarnerup aappariinnerput sequmippaa.
Piffissaq misigissutsinik pissusissamisoortunik, paasinartumik sakkortuunik ilaqarsimavoq.
Kisianni massakkut ima pisoqarpoq, sumerpiaq pissuteqarneranik paasinngisannik nalunaaquttap akunnerpassuini suliaqarnanga qiarusuinnalertarlunga. Sorpassuugamik!?
Akissut
Asasara illit
Eqqarsaatitit misigissutsitillu pillugit allatannut qujanaq. Ammarlunilu ikiortissarsiornissamut sapiissuseqarnissaq pisariaqarpoq. Piffissap taama sivikitsigisup iluani annaasaqarnerit atugarliornerillu taama annertutigisut misigisimagakkit assorujussuaq ajuusaarpunga, aamma piffissaq misigissutsinik sakkortuunik ilaqarsimammat paasisinnaalluarpara.
Oqaluttuassartat oqaluttuarigakku paasisinnaalluarpara qiallutillu suliaqanngilluinnarnissat pisariaqartittarakku. Apererusuummerpakkit qianissat inissaqartittarnerit, imaluunniit nunusarnerit?
Uanga anaanaga nammineq annaanikuuara, piffissat ilaanni igalaakkut isiginnaarujuuginnarlunga aliasunnera inissaqartillugu qiarusuinnartarpunga. Kisianni piffissaq sivisulaartoq qaangiummat aatsaat naammatsillunga qiasinnaanngorlungalu misigissutsikka aliasunneralu oqaatigisinnaanngorpakka. Kissaatigingaaraluarpara arlalippassuarnik aliasuuteqarneq qanorpiaq suliarineqarsinnaanersoq pillugu oqaluttuussinnaassallutit, kisianni misilittakkakka naapertorlugit suut ikiuutaasinnaallutillu tuppallersaataasinnaanersut inummiit inummut assigiinngillat. Uannut iluaqutaasorujussuunikuusoq tassaavoq, aliasunnera aamma annaasaqarnermut atatillugu sunniutit assigiinngitsut nassatarisai aamma misigissutsit pillugit allanik oqaloqateqartarlungalu oqaasinnguinissara ilinniarakku. Immaqa tamanna aamma ilinnut iluaqutaasinnaassasoq?
Apeqqutit Akissutillu allaffigeqqinnissaanut, imaluunniit Naapeqatigiissitsinerit ilaannut aggernissannut tikilluaqqusaavutit. Ataaniittoq takuuk.
Ajunngitsunik kissaallutit,
kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/