Taamani iliuuserisannit annertunerusumik iliuuseqarsimasinnaagaluarlunga misigisimavunga…
Aluu Apeqqutit Akissutillu.
Angutaavunga “inuusuttoq” ungasinngitsumi 30-nik ukioqalersussaq. Ataataga 2008-mi 15-inik ukioqarlunga annaavara – eqqaamasinnaasara tamakkerlugu ajoraluartumik imigassamik aalakoornartortalimmik imertorujussuunikuuvoq, baajarpassuillu imertarsimasaasa kingunerisaanik “tingua eqippoq”. Ataataga imigassamik aalakoornartortalimmik imertaraluaqisoq immitsinnut qanittorujussuarmik nuannersumillu atassuteqarnikuuvugut. Angajoqqaarpassuit allat imigassamik aalakoornartortalimmik imertartut assigalugit nakuuserniarneq ajorpoq, taamaanngilluinnarpoq – ajoraluartumik, allaat toqunerata kingorna ukiut 14-ingajaat qaangiutereeraluartut misigissusera nuanninngitsoq suli misigiuarpara, tassalu ikiorniarlugu taamanikkut iliuutsinnit annertunerusumik iliuuseqarnerusimasimasariaqarluarlunga.
Akissut
Aluu
Ilanngussannut qujanaq. Taama inuusutsigalugit ataatat annaasimagit tusarlugu misiginneqatigivakkit. Allapputit ataatat ikiorniarlugu annertunerusumik iliorsimasinnaagaluartutut suli misigisimallutit, aamma paasinninnera malillugu misigissuseq taanna ullumikkut anniaatigivat. Ikiuutaasinnaassappat misigissuseq tassaavoq uanga nammineq ilisarisinnaasara. Uanga uiga imigassamut aalakoornartortalimmut attuumassutilimmik nappaateqarnini pissutigalugu toqusoq annaanikuuara. Uima imigassamik aalakoornartortalimmik atuineranut atatillugu ajoraluartumik ilaquttama iluanni misigissutsitigut artornartunik amerlasuunik aporaattoqartarnikuuvoq. Arlallit isumaqarput uanga annertunerusumik, imaluunniit allatut iliuuseqarsimasariaqaraluartunga, taamalu ajornartorsiut aaqqinneqarsimassagaluarluni. Assuarliutit taamaattut pileraangata aliasunnerup suliarinissaa ajornakusoorsinnaavoq. Tamakku ilaatigut tassaasinnaapput misigissutsitigut artornartumik aporaannerit allanit aamma namminermit pisut. Marlunnik meeraqarpunga, taakkulu namminneq immikkut anniaatiminnik atuisimapput. Taakku ilaatigut imminnut naammaginngitsutut misigisimanikuullutillu ilerasuuteqarnikuupput. Misigissutsini taakkunani immitsinnut ataqatigiittutut ippugut, ilutigitillugulu kisimiittutut misigisimasimalluta. Naluara allatakka ilinnut naleqqiussinnaaneritit, kisianni neriuppunga ilisimagit misigissutsit sakkortuut kisivit piginnginnakkit.
Eqqarsarpunga allanik, misigissutsinik taakkuninnga atukkannik, aamma ataatannik misigisimasavit qaavatigut misigisatit pillugit ilisimasaqarnerusunik oqaloqateqarsinnaaguit pitsaassagaluartoq.
Neriuppunga akissutiga atorsinnaassagit. Uagutsinnut allaqqinnissannut tikilluaqqusaavutit.
Ajunnginnerpaamik kissaallutit, kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/