Aluu illit,  

Qujanaq allakkannut.  

Annaasaqartarsimanissinni tamassi misiginneqatigaassi. Ilaquttamik annaasaqaqattaarluni akulikitsumik oqitsuinnaasimanavianngilaq, aammalu paasisinnaavakkit nalornissuteqarsimaguit qanoq iliornissanik, illit nammineq alisunnerit kiisalu ilaqutaariullusi alisunnersi pillugu.  

Inummiit inummut aliasuuteqarneq assigiingitsorujussuusarpoq, naak annaasarsi inummut aaliangersimasumut attuumassuteqaraluartoq, soorlu illit ujoqqunnik annaasaqartutit misigissutit allaallutillu eqqarsaatitit allaanerusinnaapput illit meeqqanniit. Meeqqatit meeraapput suli ineriartortut, illooqqaminik annaasaqartut misigissutsit allat immaqalumi eqqarsaatit allat. Taamaammat aliasuuteqarnissinni ataqatigiinissarsi ikioqatigiinissaq pingaaruteqartarpoq, tamassi immissinnut inissaqartillusi. Illit anaanatut/inersimasutut aamma eqqaamassavat aliasusinnaatitaagavit meeqqat isigitillugit. Takutisinnaavammi alisunneq ajortuungilaq inissaqartinneqartorlu toqqortertariaqanngitsoq. Tamassinnut taanna toqqissisimanermik pilersitisinnaavoq.  

Ilaqutariittut misigissusilerinissamut sapersimagussi imal. nalornigussi periarfissaasinnaavoq apeqqutit annikitsut aallarniutigalugit, soorlu, massakkut qanoq ippit? Imal. aaliangersimasumik eqqarsaateqartarpit utikattunik/oqimaatsunik/paaserusutannik? Eqqaamassavarpulli aliasuuteqarluni oqaasinnguinissaq aamma nalunartarmat, oqaasissaaleqinarluni, aamma ajunngilaq taamaasinnaatitaavusi.  

Illinnguaq aamma imminut puujorniaqinak. Anaanatut/inersimasutut tunulliuppallaartoorsinnaasarneq tusarsaasarpoq ilaquttanut nukittuniarneq tapersersuinerlu annertooq atorneqalersinnaasarmat. Imminut paaralutit imminut naalaarlutit pisarina. Inersimasoqatinnik tatigisannik oqaluusaqarsinnaasutit neriuppunga.  

Soqutigigukku aamma chatti-kut allaqateqarsinnaavutit, marlunngornerit tamaasa  Aliasoqatit Chatti ammasarpoq marlunngornerit tamaasa nal. 19:00-imiit 21:00 tungaanut, tassani allaqateqarsinnaavutit toqqaanartumik Aliasoqatini kajumissutsimik suleqataasumiit.  

Aamma toqusoqarneratigut aliasuuteqarneq pillugu qaammammut ataasiarluta Nuummi Qaqortumilu naapeqatigiissitsisarpugut. 

Taakku marlunngorlugit uani paasisaqarfiginerusinnaavatit: https://aliasoqatit.gl/aliasuuteqarnermi-tapersersoqatigiinneq/

Naapeqatigiissitsinissat tulliit takuniarlugit Facebookikkut malinnaaffigitigut: https://www.facebook.com/Aliasoqatit?mibextid=LQQJ4d 

Tamassi ajunnginissassinnik kissaappasi. Aammaarlunga misiginneqatigaassi annaasaqarnissinnik.  

Inussiarnersumik inuulluaqqusillunga Aliasoqatit