Ataataga kræftimik toqussuteqarpoq
Aluu
Ataatama toquneranit qaammatit tallimanngungajalerput. Suut tamarmik ajunngikkallarnerannit toquneranut sapaatit akunneri pingasut ingerlapput. Kræftip ima sukkatigisumik tiguaa, soorlu tassa qaratsama paasinngikkaa. Nalunngilara akornatsinnikkunnaartoq, kisianni ullut ilaanni ima annernartigisarpoq, allaat anersaartorsinnaajunnaartarlunga. Tamanna pillugu inuit aperissaareerput, aamma misigisimanarsinnaavoq aliasunninnit ingerlariaqqereersimassagaluartunga. Aamma ulloqartarpunga nuannaarlunga, kisianni ullut tamaasa eqqarsaatigeqattaaginnavittarpara. Maqaasineq angeqaaq. Tamanna pillugu imminut neriorsornikuuvunga massakkumi inuussallunga, aamma pigisakka qujamasuutigissallugit. Kisianni naapertuilluanngilluinnartuuvoq.
Uanninngaanniit
Akissut
Aluu illit
Ataatat qanoq pisimasoq tusarlugu ajuusaartorujussuuvunga. Misiginneqatigisorujussuuakkit, ataataga sivikitsumik kræftimik napparsimareersoq uanga nammineq annaanikuugakku.
Toqoreernerata kingorna eqqaamasakka aamma ersarippallaanngillat, soorlulusooq allat nalinginnaasumik ulluinnarni inuunerminnik ingerlatitseqqiinnarneranni uanga silarsuara uninngasoq, tamannalu iliuuseqarfigissallugu ajornakusoortuusinnaavoq. Eqqaamavara uanga nammineq misigissutsikka, aamma qaammatit arlallit qaangiutereersut maqaasinera oqaluttuarissallugit ajornakusoortinnikuullugu, kisianni pilertortumik paasivara aliasukkaangama oqaluttuarisarnera uannut ikinngutinnullu pitsaasuusoq. Naak tamanna nipituumik oqaatigissallugu ajornakusoorsinnaagaluartoq.
Aliasunnermit ingerlariaqqereersimassagaluarnermik misigisimanerit paasisinnaalluarpara, kisianni piffissap ingerlanerani uanga paasivara aliasunnerup ingerlanera aqunneqarsinnaanngitsoq. Taamaattumik annaasaqarneq sivitsoreeraluartoq aliasussinnaaneq ajortuunngilluinnarpoq.
Nuannaarutigivara paasillugu ullut sakkortuut akornanni ullunut nuannersunut inissaqartitsillutillu nukissaqarfiginnikkavit, tamanna uanga nammineq aamma ilisarisinnaavara.
Neriuppunga ajunngitsutit, aamma akissutiga ikiuutitut atorsinnaassagit, taamaanngippat allaqqinnissannut soorunami tikilluaqqusaasorujussuuvutit.
Unnussiorluarina, kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/