Ataataga ippassaq toquvoq
Ataataga ippassaq toqusimasoq ullumi nalunaarfigineqarpunga, sivisuumik oqaloqatigiinnikkuunngilagut, anaanaga unatartarmagu aamma nukkama inunnik allanik tatiginnissinnaanera aserorluinnarnikuummagu isumakkeerfigisinnaannginnakku. Naak isumakkeerfigisinnaanngikkaluarlugu, naak kamakkaluarlunga taamaattoq aliasuppunga. Ataataalluarnikuunngilaq, imaluunniit tamatigut pitsaasuunikuunngilaq, qaqutigoorpoq. Kisianni anniarsimassanersoq, annilaangasimassanersoq annilaangassutigivara. Imminut kamaappunga, najorsimassagaluarpara, naak oqarsinnaanngikkaluarlunga “asavakkit”. Nalunngilara ataatannut tunnganngitsumik, kisianni qanoq ittuusimassagaluarneranik kissaatiga pillugu aliasullunga.
Akissut
Asasara illit,
Qujanaq allatannut – aamma uagutsinnut saaffiginninnut.
Aallarniutigalugu oqarusuppunga, ataatat toqusimammat ajuusaarpunga. Naak sivisuumik oqaloqatigiinnikuunngikkaluarlusi paasisinnaalluarpara aliasukkavit. Aamma anaanat unatartarlugulu nukkavit tatiginnissinnaanera aserorsimammagu isumakkeerfiginnissinnaannginnavit paasisinnaalluarpara.
Inuk toqugaangat oqaloqatigeqqissinnaajunnaartarparput, taamaattumillu aamma qanoq iliuutsitik pillugit nassuiaanissaannik qinnuigisinnaajunnaartarlugit, imaluunniit sooq annersilluta iliuuserisartagarisarsimasamissut iliortarsimanersut oqaluttuartissinnaajunnaartarlugit. Kamaakkivut, imaluunniit asagivut oqaluttuussinnaanngilavut. Aliasunnermi misigissuserpassuarnit aqqusaarneqartarpugut, soorlu maqaasineq, asanninneq, kamanneq aamma soriarsinnaanngitsutut misigisimaneq. Ukiut arfineq-pingasut matuma siorna uiga annaagakkuli misigissutsit amerlasuut misigisarsimavakka, aamma inuuninnut ilaatinnissaata ilikkarnissaanut piffissaq sivisusimavoq; maqaasinerata saniatigut aamma qimammatigut kamaannikuuara.
Aliasunneq kiserliornartorujussuusinnaavoq, aamma annaasaqarsimasunik allanik oqaloqateqarneq uannut iluaqutaasorujussuunikuuvoq. Taamaattumik uagutsinnut allakkavit nuannaarutigivara.
Eqqarsaatitit, aamma misigissutsitit ilinnut inituutut inissisimasut oqaluusereqqikkusussinnaagukkit allaqqinnissannut tikilluaqqusaasorujussuuvutit. Ikiornissannut piareersimavugut.
Asannittumik inuulluaqqusillunga, kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/