Annaasaqarnissamik annilaangassuteqarneq
Aluu
Anaanama napparsimanerata kingorna aqqanilinnik ukioqarlunga annaavara. Ilaquttakka 2003-miilli attaveqarfiginikuunngilakka.
Pilluarlunga ueqarpunga, pingasunillu asanarluinnartunik meeraqarlunga.
Uima, peqqissuullunilu nappaateqanngitsup, annaanissaa annilaangassutigivara. Kisianni ullut tamaasa eqqarsaatigisarpara, toquppammi? Qanoq issaanga, aamma qanoq iliussaanga? Eqqarsaatit misigissutsillu akulerussuuttut. Eqqarsaatit taakku ullut tamarluinnaasa eqqarsaatigisarpakka. Tamatuma nikallorluinnartittarpaanga. Takorloortarpara illerfiup iluanilluni qanoq isikkoqassanersoq. Takorluuillunga assilianngortittarpara.
Qanoq iliorlunga eqqarsaatit tamakku eqqarsaatiginaveersaarsinnaavakka?
Akissut
Asasara atuartartoq,
Siullermik, qujanaq eqqarsaatitit pillugit uagutsinnut allannissannut sapiillisaarsimagavit.
Meeraallutit anaaanat nappaammut annaasimagit tusarlugu misiginneqatigivakkit, tamanna siusippallaarujussuarlunilu naapertuilluarnerunngilaq.
Eqqarsaatit misigissutsillu aqqusaakkatit assorujussuaq iluaappalupput. Soorlu toqumut ersinertut assingusumik peqartutit, qanigilluinnakkamik annaasaqarsimagaanni tamatuma peqqinnissaa annilaanganartorujussuanngorsinnaavoq.
Uanga nammineq ataataga kræftimut 2019-imi annaavara, tamatumalu kingorna annaasaqarnissara piffissat ilaanni annilaangagisarsimallugu. Ataataga tulaavigisorujussuunikuuara, aamma toqunerata kingorna atsaga qanillerujussuarnikuuara. Taanna pisut ilaanni uannut tulaavinngorpoq nutaaq, ataatama maqaasinera pillugu, aamma ataatama toqoreernerata kingorna inuunerma siumut aallarteqqinnissaanut tunngasunik oqaloqatigiikkaangatta. Atsama annaanissaa annilaangagisorujussuunikuuara, pissutigalugu taanna annaagukku taava kina tulaavigilissavara, aamma ataataga pillugu kia oqaluttuuttassavaanga? Uannut iluaqutaanikuuvoq, atsama annaanissaa annilaangagalugu oqaluttuukkakku, toqqaannartumik oqaasinngorlugu pineqartup oqaluttuunnera oqiliallaataalaarpoq.
Uivit annaanissaa pillugu annilaangallutit eqqarsaatitit paasisinnaalluarpakka. Uivit annaanissaata annilaangaginera nalinginnaasuulluinnarpoq. Ukiukitsunnguullutit annaasaqarneq misigisimavat, taamaattumik eqqarsarpunga immaqa tassunga qisuariaataasoq, illit inersimasutut nammineq meeraallutit anaanavit annaanera assigalugu uivit, aamma meeqqavit ataataat, annaanissaa annilaangagalugu.
Tamatuma oqaluuserinissaa pisariaqartikkukku, maanngaanniit aamma illit nammineq annertunerusumik oqaasertaliiffigalugu, Apeqqutit Akissutillu allaffigeqqinnissaanut, imaluunniit Naapeqatigiissitsinermut peqataajartornissannut tikilluaqqusaasorujussuuvutit. Ataaniittoq takuuk.
Neriuppunga qulaani allatakka iluaqutigilaassagitit.
Inussiarnersumik inuulluaqqusillunga, kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/