Isumasioqatigiissitsineq annertunngitsoq
Isumasioqatigiissitsineq annertunngitsoq Kunngikkormiusut ataqqinassusilimmit, kunngissap nulianit Marymit peqataaffigineqartoq ‘Aliasuuteqarneq ataatsimoorfigalugu’
Aggusti 2022
Det Nationale Sorgcenteri, kalaallit suleqatigisani peqatigalugit, isumasioqatigiissitsineq, Kunngikkormiusut ataqqinassusilimmit, kunngissap nulianit Marymit peqataaffigineqartoq: ”Aliasuuteqarneq ataatsimoorfigalugu” ulloq 24. auggusti 2022 Nuummi ingerlappaa.
Kunngikkormiusut ataqqinassusilik, kunngissap nulia Mary aamma Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen isumasioqatigiinnermut peqataasunut ilaapput.
Kunngikkormiusut ataqqinassusilik, kunngissap nulia Mary Det Nationale Sorgcenterimut illersuisuuvoq, aammalu isumasioqatigiissitsinermi oqalugiarluni. Oqalugiartunut aamma ilaapput, atuakkiortoq Niviaq Korneliussen aamma meeqqat oqaaseqartartuat Aviâja Egede Lynge, aamma politimesteri Bjørn Bay, Kommuneqarfik Sermersuumi fagchefi Ellen Magnussen, Det Nationale Sorgcenterimi direktøri Preben Engelbrekt.
Kunngikkormiusut ataqqinassusilik, kunngissap nulia Mary oqalugiarnermini ilaatigut ima oqarpoq:
”Aliasuuteqarneq artornarnerpaanut ilaavoq, aammalu amerlanerpaat tamanna misiginikuullugu. Aliasuuteqarneq tassanngaannaq takkussinnaavoq. Ilimagineqanngitsumik. Aliasuuteqarneq initoorujussuuvoq, aammalu nammineq inuunerisaq piffissami aalajangersimasumi tiguaqqasinnaallugu. Taamaakkaluartoq toqu aamma aliasuuteqarneq eqqartorneq ajorpavut. Taamaattumik nuannaarutigisorujussuuara, toqu aamma aliasuuteqarneq – aamma tamanna pillugu oqallisigineqarneq ajortoq, ullumikkut sammisinnaagatsigu. Toqusoqartillugu aliasuuteqarneq pillugu oqaluuserinninnissarput pingaaruteqartorujussuuvoq. Oqaluuserinninnermi toqusoqartillugu aliasuuteqarnermik oqilisaasseqataasinnaavoq – annikitsunnguugaluamik.”
Isumasioqatigiissitsineq Aliasoqatini kajumissutsiminnik suleqataasut siulliit ilaasa marluk oqaloqatigineqarnerannik aamma ilaqarpoq, taakkununnga suup kajumilersitsisimanera, aamma kajumissutsimik suleqataaneq namminermut sunik tunisisarnersoq, aamma toqusoqarneratigut nammineq aliasuuteqarnerup qimagaasunik allanik ikiuinermut atornera oqaloqatigiissutigineqarlutik.