Uanga inuulluaqqusinera
Qanigisannik toqusoqarsimanera pissutigalugu aliasuuteqarpit?
Aliasuuteqarneq pillugu Qaqortumi naapeqatigiissitsinermut peqataajartorit
&
Aliasuuteqarneq pillugu Nuummi naapeqatigiissitsinermut peqataajaartorit.
Uanga naggammik inuulluaqqusinera ❤️
Napparsimasoqarneratigut, imminut toquttoqarneratigut, ajutoortoqarneratigut imaluunniit allatut qanigisannik annaasaqarsimanerit pissutigalugu aliasuuteqarpit?
Naapeqatigiissitsinermi tassani sammineqartussaq tassaavoq ”Uanga naggammik inuulluaqqusinera”. Asasatsinnik inuulluaqqusineq artornartuuvoq, aammalu assigiinngitsumik ingerlasinnaalluni. Piffissaq kingulleq asanninnermik, aamma pitsaasumik oqaloqatigiittarnernik imaqassasoq kissaatigisarparput.
Kisianni ilaannikkooriarluni kissaatigisatsinnit allaanerusarpoq. Immaqa tassanngaannartumik annaasaqarnerput, imaluunniit napparsimanerup ingerlanerata uivernarnera pissutigalugit torersumik naggammik inuulluaqqusinngitsoorsimasinnaavugut. Piffissap kingulliup ingerlanerata ilaa ilaannikkooriarluta aamma qujamasuutigisinnaasarparput, aammalu tamanna aallutissallugu, imaluunniit allanut oqaluttuarissallugu qujanarsinnaasarluni.
Kajumissutsiminnik suleqataasut asasaminnik naggammik inuulluaqqusinertik pillugu misilittakkaminnik oqaluttualaarnerannik unnuk aallartinneqassaaq.
Tamatuma kingorna peqataasut misigisimasatik pillugit oqaluttuarnissaminnik periarfissaqassapput, tamannalu sapiissuseqarfiginngikkaanni allat oqaluttuarneranni tusarnaaginnarnissamut aamma tikilluaqqusisoqarpoq.
Kaffi, tii kaagilu sassaalliutigineqassapput.
- Sumi: Illorput, Sorlaat 11, Nuuk
- Sumi: Lions Club, 3920 Qaqortoq
- Qaqugu: Pingasunngorneq, 16. oktobari 2024, nal. 19.00-imiit 21.00-imut
Aaqqissuisut: kajumissutsiminnik suleqataasut, ”Aliasoqatit – Toqusoqartillugu aliasuutinik oqilisaqatigiiffik” – https://aliasoqatit.gl