Qanigisannik toqusoqarsimanera pissutigalugu aliasuuteqarpit?   

Toqusoqarneratigut aliasuuteqarneq pillugu Nuummi Qaqortumilu Naapeqatigiissitsinissanut peqataajartorit

Uanga naggammik inuulluaqqusinera  ❤️ 

Napparsimasoqarneratigut, imminut toquttoqarneratigut, ajutoortoqarneratigut imaluunniit allatut qanigisannik annaasaqarsimanerit pissutigalugu aliasuuteqarpit?   

Naapeqatigiissitsinermi tassani sammineqartussaq tassaavoq ”Uanga naggammik inuulluaqqusinera”.  Asasatsinnik inuulluaqqusineq artornartuuvoq, aammalu assigiinngitsumik ingerlasinnaalluni. Piffissaq kingulleq asanninnermik, aamma pitsaasumik oqaloqatigiittarnernik imaqassasoq   kissaatigisarparput. Kisianni ilaannikkooriarluni kissaatigisatsinnit allaanerusarpoq. Immaqa tassanngaannartumik annaasaqarnerput, imaluunniit napparsimanerup ingerlanerata uivernarnera pissutigalugit torersumik naggammik inuulluaqqusinngitsoorsimasinnaavugut. Piffissap  kingulliup ingerlanerata ilaa ilaannikkooriarluta aamma qujamasuutigisinnaasarparput, aammalu tamanna aallutissallugu, imaluunniit allanut oqaluttuarissallugu qujanarsinnaasarluni. 

Kajumissutsiminnik suleqataasut asasaminnik naggammik inuulluaqqusinertik pillugu misilittakkaminnik oqaluttualaarnerannik unnuk aallartinneqassaaq.   

Tamatuma kingorna peqataasut misigisimasatik pillugit oqaluttuarnissaminnik periarfissaqassapput, tamannalu sapiissuseqarfiginngikkaanni allat oqaluttuarneranni tusarnaaginnarnissamut aamma tikilluaqqusisoqarpoq.  

Kaffi, tii kaagilu sassaalliutigineqassapput.   

• Qaqugu: Pingasunngorneq, 27. aggusti 2025, nal. 19.00-imiit 21.00-imut
• Sumi:  Nuuk: Neriuffiit Kattuffiat, Blok 6-003
• Sumi:  Qaqortoq: Det Gule Bibliotek, Skolevej B-97

Aaqqissuisoq: kajumissutsiminnik suleqataasut, ”Aliasoqatit – Toqusoqartillugu aliasuutinik oqilisaqatigiiffik” – https://aliasoqatit.gl