Oqaatiginngitsuugarpassuakka ❤️

Aliasuuteqarneq pillugu Nuummi naapeqatigiissitsinermut peqataajartorit

Qanigisannik napparsimasoqarneratigut, imminut toquttoqarnertigut, ajutoortoqarneratigut, atornerluinikkut imaluunniit allatut pisoqarneratigut annaasaqarnerit pissutigalugu aliasuuteqarpit?

Naapeqatigiissitsinermi tassani sammineqartussaq tassaavoq ”Oqaatiginngitsuugarpassuakka”. Annaasaqaraangatta oqaatigerusussimasinnaavut imaluunniit oqaloqatigiissutigerusussimasinnaasavut amerlasuutigut amerlasarput. Kisianni taamaliunngitsoortarpugut, immaqa tassanngaannartumik annaasaqarnerput pissutigalugu, imaluunnit napparsimanerup ingerlanerani ajornakusoorpallaarnera pissutigalugu.

Allat tamanna qanoq misigisaqarfigisimaneraat tusarnaariartoruk. Kajumissutsiminnik suleqataasut marluk, tamarmik annaasaqarsimasut, saqqummiinerannik unnuk aallartinneqassaaq.

Tamatuma kingorna kaffeqarumaarpoq, aammalu annaasaqarsimasunik allanik oqaloqateqarnissamut periarfissaqassalluni.

• Sumiiffik:  Illorput, Sorlaat 11, Nuuk
• Qaqugu: Pingasunngorneq 21. aggusti, 2024 nal. 19.00-imiit 21.00-imut

Aaqqissuisoq: kajumissutsiminnik suleqataasut, ”Aliasoqatit – Toqusoqartillugu aliasuutinik oqilisaqatigiiffik” – https://aliasoqatit.gl