Aliasunnerup ilaqutariit allanngortikkaangagit

Aliasuuteqarneq pillugu Nuummi naapeqatigiissitsinermut peqataajartorit.

Ilinnut napparsimasoqarneratigut, imminut toquttoqarneratigut, ajutoortoqarneratigut, atornerluisoqarneratigut imaluunniit allatut illit qanigisannik annaasaqarsimasumut.

Naapeqatigiissitsinermi tassani sammineqartussaq tassaavoq, aliasunnerup ilaquttat allanngortikkaangagit. Ilaqutariinni toqusoqarneratigut annaasaqarsimasagaanni taava ilaqutariittut nutaamik inuuneqalerneq aamma ingerlanniarneqartussaavoq. Immaqa ilaqutariit iluanni aamma ikinngutit akornanni atuuffiit, sunniivigeqatigiinnerit aamma atassuteqarnerit allannguuteqalaarput. Tamanna artornarsinnaavoq, aammalu oqaloqatigiissutigisinnaagaanni pitsaasuulluni. 

Kajumissutsiminik suleqataasut marluk, tamarmik annaasaqarsimasut, saqqummiinerannik unnuk aallartinneqassaaq. Tamatuma kingorna kaffeqarumaarpoq, aammalu annaasaqarsimasunik allanik oqaloqateqarnissamut periarfissaqassalluni.

• Sumiiffik: Illorput, Sorlaat 11, Nuussuaq.

• Qaqugu: Pingasunngorneq, ulloq 10. apriili, 2024 nal. 19.00-imiit 21.00-imut. 

Aaqqissuisut: kajumissutsiminnik suleqataasut, ”Aliasoqatit – Toqusoqartillugu aliasuutinik oqilisaqatigiiffik” – https://aliasoqatit.gl