Ukiut pingasunngukerput Anaanamik annaasaqarneq
Aluukkut
Neriuppunga iluaqutaasinnaassasoq avitseqateqarneq
Uanga anaanaga napparsimalluni toqukkut qimagunnikuuvoq, inuttut qanittunnguuvugut telefonikkut oqaliqatigiillattaajuartut
Ullumikkut aluasuutima annersaraat immaqa utaqqisuusineq, oqaloqatigiittarnitsinni inuttut aaliangiusimasaminik saqqummiussisarnera oqaaqqissaarinera killiffissiuusarneralu assorsuaq maqaasivakka
Aliasunninni initupput assut
Akissut
Aluu illit,
Qujanaq tatiginnillutit allatannut. Aliasuuteqarnerit paasisinnaavara, annaasaqarsimaninnilu misiginneqatigaakkit.
Allatanniit paasisinnaavara anaanallu qanimut ataqatigiilluartuusimasusi, ulluinnarsiutaasimasorlu oqaluutillattaasarnera. Inuuninni initusimassaaq anaanat, tamannalu annertuumik maqaasinerit pissusissamisoorpoq.
Allapputit alisuutinni annersarigaa utaqqisuusisarnerit, taanna misigissuseq inuppassuit ilisarilluarsinnaavaat asasaminnik qanigisaminnik annaasaqarnikunik.Soolu timitta attaveqarfigineqarnissaminik utaqqisalik, pisariaqartitsilluni. Nipi, timi inuullu allap isumaa asasagut tatigisagut pisariaqartisinnaasaratsigit, taannalu qularinngilara anaananniit pisarsimassagit. Aliasuuteqarluni taanna aqqusaagassat ilagaat naliginnaasoq, inooqatiginissaanut ilinniagassaq.
Piumaguit allaffigeqissinnaavartsigut avitseqatigalut, anaanat ilinnut qanoq oqariartuuteqakajuttarpa? Inuunermi sunaana oqariartuutigisaraa? Sunaana ilinni pingaartitarigaa? Imaluunniit qanoq ilinikkununa maqaasinerit inittortartoq?
Toqukkut qimagussimasut eqqartortarnerini imaluunniit eqqarsaatigisarneri aamma peqqinnartortaqarnerit maluginiartarpara inuunermi ingerlariaqqiffiusinnaasunik soorlulusooq aqqutissaq ajornannginnerulertartoq.
Qujanaq avitseqatigigatsigut, kisimiinngilatit taamatut nalaataqartoq.
Soqutigigukku aamma chatti-kut allaqateqarsinnaavutit, marlunngornerit tamaasa Aliasoqatit Chatti ammasarpoq marlunngornerit tamaasa nal. 19:00-imiit 21:00 tungaanut, tassani allaqateqarsinnaavutit toqqaanartumik Aliasoqatini kajumissutsimik suleqataasumiit.
Aamma toqusoqarneratigut aliasuuteqarneq pillugu qaammammut ataasiarluta Nuummi Qaqortumilu naapeqatigiissitsisarpugut.
Taakku marlunngorlugit uani paasisaqarfiginerusinnaavatit: https://aliasoqatit.gl/aliasuuteqarnermi-tapersersoqatigiinneq/
Naapeqatigiissitsinissat tulliit takuniarlugit Facebookikkut malinnaaffigitigut: https://www.facebook.com/Aliasoqatit?mibextid=LQQJ4d
Neriuppunga akissutiga ilinnut iluaqutaasinnaassasoq, aamma allaqqinnissannut tikilluaqqusaajuaannarputit.
Ajunnginnerpaamik kissaappakkit.
Ajunngikkina
Inussiarnersumik inuulluaqqusilluta
Aliasoqatini kajumissutsimik suliaqaqatigiit