Asasarput illit, 

Aliasoqatini Apeqqutit Akissutillu allaffigigakkit, ukiullu amerlasuut qanoq issimaninnik oqaluttuarlutit qujanaq. Ernerpit annaasimanera – aammalu ernerpit ataataata kingusinnerusukkut kræftimik toqquteqarsimanera tusarlugit misiginneqatigingaarpakkit. Annaasat marluk nammallugit annertupput, aammalu illit inuuninnut itisuumik sunniuteqarsimappata tamanna paasinarluinnarluni. 

Meerarisaq annaagaanni annaasaq inuunerup sinneranut malinnaasutut issinnaavoq. Aammalu aliasunneq ilutigisaanik qanigisamik allamik annaasaqarnermik ilallugu artukkerneqarneq suli anginerulersinnaalluni. Naak ukiut aqqanillit qaangiutereeraluartut ukiorpassuarni qasunermik misigisimaneq, nuannaassaqannginneq aamma nukissaalatsineq misigisimasimagakkit paasinarpoq. Aliasunneq piffissamik malitaqarneq ajorpoq, aammalu piffissap ingerlanerani pinngitsoornani qaangiunneq ajorluni.  

Inuit amerlasuut toqusoqarneratigut aliasuutillit piffissap ingerlanerani imminnut ima aperisinnaasarput: “Uangaana ajoquteqartunga?” imaluunniit “Sooruna suli taama qasoqqatigisunga?” Eqqarsaatit ilisarnartorujussuupput. Imaanngilaq illit sanngiikkavit, imaluunniit arlaannik kukkussuteqaravit – tamanna aliasunnerup ukiorpassuarni nipaatsumik inittoriartorsimaneranut ersiutaasinnaavoq. 

Sivisuumik nammatat nammaannarlugit ingerlaniaannartariaqarsimagaanni timi naggataatigut sunnerneqartarpoq. Aliasunneq qasunertut, imaqanngitsutut misigisimanertut aamma inuuginnarusussutsip amigaatigilerneratut inissisinnaavoq. Tamanna atorlugu kiserliornartorujussuusinnaavoq, pingaartumik tamanna qaangiutereersimassagaluartoq avatangiisit eqqarsarpata.  

Eqqarsaatit tamakku kisimiilluni atunnginnissaat iluaqutaasinnaavoq. Annaasat aamma ullumikkut qanoq innerit pillugu oqaloqatigisinnaasannik immaqa inoqarpoq. Meeqqaminnik imaluunniit aaparminnik namminneq annaasaqarsimasunik, aamma aliasunnerup inuunermi qanoq atuunneranik paasinnissinnaasunik oqaloqateqarneq ilaannut aamma pitsaasuusinnaasarpoq.  

Aliasoqatini kajumissutsiminnik suleqataasut, toqusoqarneratigut namminneq annaasaqarsimasut, aamma aliasunneq qaangiunneq ajortoq – kisiannili allanut oqaluttuarigaanni oqiliallassinnaaneranik ilisimaarinnittut naapissinnaavatit.  

Apeqqutit Akissutillu allaffigeqqinnissaannut tikilluaqqusaajuaannarputit, imaluunniit kinaassutsit isertuullugu kajumissutsiminik suleqataasumik chatteqateqarlutit. Toqusoqarneratigut aliasuuteqarneq pillugu Nuummi, Sisimiuni aamma Qaqortumi qaammammut ataasiarluni naapeqatigiissitsisoqartarpoq. Tassani inuit allat aamma toqusoqarneratigut annaasaqarsimasut – aliasunneq qanoq misigisimanarsinnaanersoq pillugu – aamma annaasaqarnerup pineranit ukiorpassuit qaangiunneranni paasinnittut naapissinnaavatit. Oqaaseqarnissat pisariaqanngilaq; aamma tusarnaaginnarsinnaavutit. 

 

Aliasoqatit toqusoqarnerani aliasuuteqartunut neqeroorutaat annertunerusumik uani paasisaqarfigisinnaavatit:

https://aliasoqatit.gl/da/sorgstoette/  

Facebookikkut aamma malinnaaffigisinnaavatsigut https://www.facebook.com/Aliasoqatit?mibextid=LQQJ4d 

Aamma imaassinnaavoq aliasunninni katsorsaanermut tunnganerusutigut ikiorneqarnissat pisariaqartinnerullugu misigisimasutit. Inulerivimmut saaffiginnissinnaavutit, tassani terapeutit aliasunnermik aamma ajornartoornermik misilittagallit sulisorineqarput. Taakku qanoq iliorlutit attaveqarfigisinnaanerlugit uani annertunerusumik paasisaqarfigisinnaavat: https://inulerivik.gl/  

 

Illit ajoquteqanngilatit. Annaasat angisuut nammatarisimavatit, aammalu timi eqqarsartaatsillu tamatumunnga qisuariarluni.   

Kisimiinngilatit, aamma uagutsinni tikilluaqqusaajuaannarputit.❤️ 

Inussiarnersumik inuulluaqqusilluta

Aliasoqatini kajumissutsiminnik suleqatigiit