Asasarput illit,  

Ernerit annaasimagit tusarlugu misiginneqatigingaarpakkit.  

Misigissutsitit artornartut, aamma aliasunnerit angisooq kiserliornerillu allakkanni malugisinnaasutut ippakka.  

Kisimiinnginnavit siullertut ilisimassavat, aamma asasorujussuusatsinnik annaasaqaraarangatta misigissutsitiigut sakkortoorujussuarmik tamatta eqqorneqarsinnaasarpugut, soorlu illit erninnut taamaattutit.  

Aliasunneq annernartuuvoq, aamma annaasaqaraangata siornatigut misigisimanngisaannakkatsinnik misigisaqarsinnaasarpugut. Aamma aliasunneq tamatta immikkut assigiinngitsumik misigisarparput. Kamannermik, miserratiginninnermik, oqiliallannermik, pisuusutut imaluunniit kanngusuttutut  misigisimagaluaruttaluunniit – misigissuseq sunaluunniit kukkusuunngilaq. 

Tassunga ilanngullugu qaniginerpaasavut aamma aliasuttut oqaloqatiginiarnerat ajornakusoortorujussuusoq misigisinnaasarparput – amerlasuutigut assigiinngitsorujussuarmik aamma piffissani assigiinngitsuni aliasuttarnerput pissutigalugu. 

Soorlumi aamma uinnut atassuteqarninnut aamma oqaloqateqartarninnut tunngatillugu tamanna misigisarsimarpasikkit. 

Ilaqutariit iluanni annaasaqaraangatta taava ilaqutariittut, imaluunniit aappariittut inuunerup ingerlateqqinnissaa nutaamik nassaareqqinniartussaasarparput. Tamanna ajornakusoorsinnaavoq, kisianni aamma allatut periuseqarluni peqatigiilluni oqaloqatigiissutigisinnaanera nassaarisinnaagaanni iluaqutaasinnaalluni.  

Illit uiillu assigiinngitsumik aliasukkaluarlusi pingaarutilimmik misigisaqaqatigiippusi – tassalu ernissinnut asaninneq, aamma naak ernersi toqoreeraluartoq. Tamassi immikkut assigiinngitsumik aamma artornartumik aliasunnersi misilillugu oqaasertalerniarsinnaagussiuk taava qularinngilluinnarpara oqiliallanneq, aamma ernissinnut asanninnissigut aamma aliasunnissigut ataatsimooruteqarneq misigissagissi – taannalu aqqutigalugu inuunissi ingerlanerani nammassinnaanissaanut aamma ataqqinartuutinnissaanut periuseq nassaaralugu. 

Iliuuserisinnaasat alla immaqa tassaasinnaavoq ikinngutinnut, imaluunniit allamut ilisarisimalluakkannut ikiortissarsiornissat. Pingaarnerpaaq tassaavoq misigissutsitit artornartut pillugit oqaloqateqarnissat.  

Uanga nammineq aliasunnerma allanut oqaloqatigiissutiginiarsarisarnera iluaqutaasoq misiginikuuara. Aallartinniarneq ajornakusoortorujussuuvoq, kisianni taamaaliornissara sapiissuseqarfigigaangakku ajunnginnerujussuanngorlungalu oqiliallattutut misigisimasarpunga.  

Oqimaatsorujussuarmik aamma ajornakusoortorujussuarmik qaangerniagaqarputit. Aamma qanorluunniit illit ataqqinassusiiagaanavianngilatit. Kisianni aalassaqqanerit aamma pisarnittut inngitsutut misigisimanerit paasinarpoq. Toqusoqarneratigut qimagaasimasunik allanik oqaloqateqarnissamik periarfissarsiguit tamanna taakkunannga ilisarineqarsinnaassaaq. Uanga ilisarisinnaalluarpara!  

Kinaassusersi oqaatiginngilluinnarlugu Aliasoqatini kajumissutsimik suleqataasumik, nammineq aamma annaasaqarsimasumik, marlunngornerit tamaasa nal. 19-imiit 21-p tungaanut chatteqateqarsinnaavusi. Immaqa uiillu peqatigiillusi misiliinissarsi sapiissuseqarfigisinnaassavarsi. 

Aamma toqusoqarneratigut aliasuuteqarneq pillugu qaammammut ataasiarluta Nuummi Qaqortumilu naapeqatigiissitsisarpugut. 

Taakku marlunngorlugit uani paasisaqarfiginerusinnaavatit: https://aliasoqatit.gl/aliasuuteqarnermi-tapersersoqatigiinneq/

Naapeqatigiissitsinissat tulliit takuniarlugit Facebookikkut malinnaaffigitigut: https://www.facebook.com/Aliasoqatit?mibextid=LQQJ4d 

Neriuppunga akissutiga ilinnut iluaqutaasinnaassasoq, aamma allaqqinnissannut tikilluaqqusaajuaannarputit. 

Ajunnginnerpaamik kissaappakkit. 

Inussiarnersumik inuulluaqqusilluta 

Aliasoqatini kajumissutsimik suliaqaqatigiit