Asasarput illit,  

Aliasoqatinut allakkavit aamma eqqarsaatitit uagutsinnut oqaluttuarigakkit qujanaq. Eqqarsaatitit oqaasinngortikkakkit alloriarneruvoq pingaarutilik siulleq.  

Ataatavit aliasuutiginera suli initummat paasinarpoq, naak toqummat mikisunnguugaluarlutit. Aliasunneq ukiut, piffissaq imaluunniit annaasimasap qanoq sivisutigisumik ilisimarisimasimanera atorlugit uuttortarneqarsinnaanngilaq. Aliasunnerit allat aliasunnerisulli ilumoortigalunilu pingaarutigivoq – qanorluunniit qatanngutivit sivisunerusumik najortigisimagaluarpassuk. 

Amerlasuut inuunerminni siusissukkut annaasaqartut misigisimasarput aliasunneq inuunerup ingerlanerani kingusinnerusukkut erseqqinnerulersutut ittartoq. Ukioqqortusinermi atassuteqarfiup annaasimanera, aamma misiginngitsoorsimasat tamarmik qanoq isumaqarnersut paasinarnerulersarput. Tamanna maqaasinermik, nikallunganermik aamma naapertuilluanngitsutut misigisimanermik pilersitsisinnaavoq. Taama misigisimaneq ajortortaqanngilaq.  

Aliasunneq malittarisassaqarnanilu killeqanngitsoq illit nammineq paasisimagakku ajunngitsuullunilu silatusaarneruvoq. Misigissutsit misigisavit misiginissaannut pisinnaatitaaffeqarputit. Naleqqussarniarlutit aliasunnerit annikinnerulersissanngilat – inissaqartinneqarnissaa pisariaqarpoq. 

Neriuppunga ataatat pillugu, aamma illit ilunni initutitatit pillugit oqaloqatissaqartutit – immaqa ikinngummik, ilaquttavit ilaannik imaluunniit allamik illit toqqissisimaffigisannik. Aliasunneq allanut oqaluttuaralugu nammannissaa oqinnerulaalersinnaavoq. Aamma toquneratigut annaasimasaq pillugu oqaluttuanik tusarnissaq pingaaruteqarsinnaavoq. Taamaaliornikkut allat oqaluttuaat aqqutigalugit inuk taanna ilisarisimanerulerlugu. 

Aliasoqatinut tikilluaqqusaajuaannarputit. Apeqqutit Akissutillu allaffigeqqissinnaavat, kinaassutsit isertuullugu kajumissutsiminik suleqataasumik chatteqateqarlutit, marlunngornerit tamaasa nal. 19–21, imaluunniit Aliasoqatit toqusoqarneratigut aliasuuteqartunut neqeroorutaanut peqataallutit – sumi najugaqarnerit apeqqutaatillugu ornigullutit imaluunniit digitali aqqutigalugu.  

Toqusoqarneratigut aliasuuteqarneq pillugu Nuummi, Sisimiuni aamma Qaqortumi qaammammut ataasiarluni naapeqatigiissitsisoqartarpoq.  

Tassani inuit allat aamma toqusoqarneratigut annaasaqarsimasut, aliasunneq qanoq misigisimanarsinnaanersoq pillugu aamma paasinnissinnaasut, naapissinnaavatit. 

 

Aliasoqatit toqusoqarnerani aliasuuteqartunut neqeroorutaat annertunerusumik uani paasisaqarfigisinnaavatit:

https://aliasoqatit.gl/da/sorgstoette/  

Facebookikkut aamma malinnaaffigisinnaavatsigut https://www.facebook.com/Aliasoqatit?mibextid=LQQJ4d 

Aamma imaassinnaavoq aliasunninni katsorsaanermut tunnganerusutigut ikiorneqarnissat pisariaqartinnerullugu misigisimasutit. Inulerivimmut saaffiginnissinnaavutit, tassani terapeutit aliasunnermik aamma ajornartoornermik misilittagallit sulisorineqarput. Taakku qanoq iliorlutit attaveqarfigisinnaanerlugit uani annertunerusumik paasisaqarfigisinnaavat: https://inulerivik.gl/ 

 

Kisimiinngilatit ❤️ 

Inuulluaqqusilluta 

Aliasoqatini kajumissutsiminnik suleqatigiit