Asasarput illit,

Aliasoqatini Apeqqutit Akissutillu allaffigalugit eqqarsaatinnik oqaluttuukkatsigut qujanaq. Angajoqqaatit illugiillugit annaasimagitit tusarlugu misiginneqatigingaarpakkit.

Angajoqqaaverulluni kiserngorunneq kiserliornartorujussuartut, aamma qimagaalluinnarsimasutut misigimanarsinnaasorujussuuvoq – qassinilluunniit ukioqaraluaraanni.

Angajoqqaat annaagaanni inuit asasimasorujussuusat kisimik annaaneqarneq ajorput, aammali tunngaviusumik attuumassuteqarnermik misigisimaneq, aamma tapersersorneqarnissamik isumassorneqarnissamillu piffigisinnaasat annaaneqartutut ittarput.

Maqaasinerup artornartorujussuanngorsinnaasarnera, aammalu aliasunnerup ilaannikkooriarluni atoruminaassinnaasarnera paasinarpoq.

Maqaasinerup takkuteqattaartarnera inuit amerlasuut misigisarpaat.

Ilaannikkut naammaginartumik inuusoqarsinnaasarpoq, aammali aliasunnerup ilaannikkooriarluni suna tamaat qulangersimalersutut ittarlugu – immaqa ilimagineqanngilluinnartumik. Maqaasineq sakkortusilluinnaraangat aliasunnerup akiorniarneranut taarsiullugu aliasunnerup atornissaanut iliuutsinik annikitsunnguanik iliuuserisartagassanik nassaarniartoqarsinnaavoq.

Ilaannut tunuaamilaarneq, qianeq, eqqarsaatit allannerat imaluunniit eqqaamasat, assit imaluunniit ileqqulersuutit atorlugit toqusut eqqarsaatigineri iluaqutaasarput.

Aamma eqqaamassallugu pingaaruteqarpoq, aliasunneq illit nammineq kisivit qaangerniartariaqannginnakku. Immaqa angajoqqaatit, aamma massakkut qanoq innerit pillugit oqaloqatissaqarputit. Maqaasinerup oqaasertalerneratigut nammassinnaaneranut oqiliallaataalaarsinnaavoq.

Apeqqutit Akissutillu allaffigeqqinnissaannut tikilluaqqusaajuaannarputit, imaluunniit kinaassutsit isertuullugu kajumissutsiminik suleqataasumik chatteqateqarlutit.

Toqusoqarneratigut aliasuuteqarneq pillugu Nuummi, Sisimiuni aamma Qaqortumi qaammammut ataasiarluni naapeqatigiissitsisoqartarpoq.

Tassani inuit allat aamma toqusoqarneratigut annaasaqarsimasut – aliasunneq qanoq misigisimanarsinnaanersoq pillugu – aamma annaasaqarnerup pineranit ukiorpassuit qaangiunneranni paasinnittut naapissinnaavatit.

Oqaaseqarnissat pisariaqanngilaq; aamma tusarnaaginnarsinnaavutit.

Aliasoqatit toqusoqarnerani aliasuuteqartunut neqeroorutaat annertunerusumik uani paasisaqarfigisinnaavatit:

Sorgstøtte

Facebookikkut aamma malinnaaffigisinnaavatsigut:

https://www.facebook.com/Aliasoqatit?mibextid=LQQJ4d

Aamma imaassinnaavoq aliasunninni katsorsaanermut tunnganerusutigut ikiorneqarnissat pisariaqartinnerullugu misigisimasutit. Inulerivimmut saaffiginnissinnaavutit, tassani terapeutit aliasunnermik aamma ajornartoornermik misilittagallit sulisorineqarput.

Taakku qanoq iliorlutit attaveqarfigisinnaanerlugit uani annertunerusumik paasisaqarfigisinnaavat:

https://inulerivik.gl/

Kisimiinngilatit, aamma uagutsinni tikilluaqqusaajuaannaarputit. ❤️

Inussiarnersumik inuulluaqqusilluta

Aliasoqatini kajumissutsiminnik suleqatigiit