Anaanaga ullut tamaasa maqaasisarpara
Aluu
Anaanaga aqqanilinnik ukioqarlunga napparsimaneratigut annaavara.
Ullumikkut 35-nik ukioqarpunga, asanarluinnartunullu pingasunut anaanaallunga. Anaanaga ullut tamaasa maqaasisarpara, ullut ilai allanit artornarnerusarput.
Toqunissaa sioqqullugu, aamma kingorna taamanikkut ullut kingumut eqqarsaatigileraangakkit qiajunnaarneq ajulersarpunga.
Inunnik allanik ilaqaraluarlunga kiserliortutut misigisimasarpunga. Oqaluuserinissaa ajornakusoortippara.
Eqqarsaatigisartakkakka tassaapput, inuit immaqa tusarnaarnavianngikkaannga, imaluunniit pingaarutilittut isiginavianngikkaat.
Naluara. Ullumikkut ulloq nikallunganaannarpoq. Qiangaatsiarpunga, misigissutsikka toqqortortariaqarpakka, meeqqakka sunnerusunngilakka. Artornaannarpoq. Qanoq iliortoqarsinnaava?
Akissut
Asasara illit
Siullertut, taama ukiukitsigalugit annaasaqarsimanerit tusarlugu misiginneqatigingaarpakkit, naapertuilluanngilluinnarpoq siusippallaarujussuarlunilu!
Ataataga ukiut arfineq-pingasut matuma siorna, 18-inik ukioqaleqqammerlunga, annaavara.
Aliasunneq uannut tassaavoq uannut ilaasoq. Qaquguluunniit qaangernavianngilara, kisianni inuunerma ilagivaa, aamma uanniippoq. Aliasunneq siusinnerusumut sanilliullugu uannut ilutsimigut allanngorlunilu allatorujussuaq initussuseqalernikuuvoq. Ataataga maqaasivara, kisianni maqaasineq inuuninni ullut tamaasa ilaaneq ajorpoq. Soorlu ilinnut ullut tamakkiallugit suli ilaasoq? Ukiuni taama amerlatigisuni maqaasineq taama akulikitsigisumik misigisarlugu sakkortorpalullunilu nukkiornarpaluttorujussuuvoq. Anaanavit taama siusitsigisumik annaanera pillugu kingunerlutsitsinerit pillugu arlaannik oqaloqateqarnikuuit? Meeraatilluni annaasaqaraanni nammineq pisariaqartitaq suunersoq oqaasertaleruminaassinnaavoq, imaluunniit ikiortissarsiornissaq ajornakusoorsinnaalluni, aamma pisup ingerlanerani annaasaqarneq pillugu oqaasinngortitsinissamut avatangiiserisat ilaannit ikiorneqarlunilu tapersersorneqarnissaq pisariaqarsinnaavoq?
Aliasunneq inuttut ataasiakkaatut misigineqartarpoq, aamma aliasunnerup ingerlanera peqqissaarussamik ingerlanneqarsimanngikkaangat annaasaqarnerup kinguninngua pisutut ukiorpassuit qaangiunnerini sakkortuumik misigineqarsinnaasarpoq. Ikiortissarsioruit ilagisartakkavit paasisinnaallutillu inissaqartissinnaasimassaneraatit oqaaseqarfigisinnaanngilara, kisianni oqarsinnaavunga uanga inuusunnerugallarama ilagisartakkannit paasineqartutut, imaluunniit inissaqartinneqartutut misigisimasimannginnama. Kisianni Aliasoqatini kajumissutsinnik suleqataaninni ataatsimoorneq paasinninnerujussuarmik ilalik, aamma inissaqartitsiffiulluartoq nassaarivara, aliasunninnut tunngatillugu qasukkarsimasutut ulluni amerlanerpaani misigisimalersimallunga. Ullut ilaanni suli maqaaserujussuartarpunga, isumaqarpunga tamanna qaangiutivinngisaannassasoq, aamma ajunngilaq. Inissaqartinnissaa, aamma takkukkaangat uninngaffiginissaa pikkoriffiginerulernikuuara, takkukkaangat annissinnaanera oqiliallaataasorujussuuvoq, aammalu misilittakkakka malillugit ajornerpaamik iliuuserisinnaasara tassaavoq misigissutsima toqqortorniarsaralugillu naqisimaniarsarinissaat.
Allapputit misigissutsitit toqqortertariaqarlugit, meeqqavit sunnerusunnginneri pissutigalugu? Uanga nammineq meeraqanngilanga, taamaalillunga toqqaannartumik tamanna misilittagaqarfiginngilara, aamma naluara meeqqatit qassinik ukioqarnersut, kisianni uanga arlalinnik mikisunik jorngoqarpunga. Ataataga pillugu taakku apeqquteqaraangata, imaluunniit aliasunnersunga aperigaangata unneqqarissumik akisarpakka, aamma misigikkajuttarpara tamanna pillugu toqqaannartorujussuullutillu peqataaffigilluartaraat. Uanga nammineq isumaqarpunga inersimasut qisuariartarnerannut tunngatillugu tamatumunnga qisuariartarnerat oqiliallaataasartoq. Meeqqatit immaqa aanartik pillugu tusagaqarusupput, immaqa aamma ajornakusoortut pillugit kusanartumik oqaloqatigiissinnaavusi? Paasisinnaavara nukissaqarfigissallugu ajornakusoorsinnaasoq, immaqa aamma meeqqavit ilanngutitinnginnerini illit nammineq aliasunnerit pillugu allanik oqaloqateqartariaqassuutit, kisianni aliasunneq ajortuunngilaq, inuppalaarnerinnaavoq.
Assigiinngitsorpassuit pillugit allapputit, eqqortumik paasinerlutit qulakkeerniarlugu apeqquteqarfigerusutannik, allaffigeqatigiittarfik ilaatigut ajornakusuulaarsinnaasarami. Apeqqutit Akissutillu allaffigeqqinnissaanut, imaluunniit Naapeqatigiissitsinermut peqataajartornissannut tikilluaqqusaasorujussuuvutit. Ataaniittoq takuuk.
Ajornakusoortut tamaasa oqaloqatigiissutigerusuppavut, aamma eqqarsaatitit pillugit tusarnaarusulluta.
Eqqarsaatinik nuannersunik nassippakkit, neriuppungalu allatakka pissarsiaqarfigisimassagitit.
Asannittumik inuulluaqqusillunga, kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/