Asasarput illit, 

Aliasoqatini Apeqqutit Akissutillu allaffigigakkit aammalu qanoq inninnik oqaluttuarlutit qujanaq. Anaanat annaasimagit, aammalu aliasunnerit oqimaatsutut kiserliornartutullut misigisimagit tusarlugit misiginneqatigingaarpakkit. 

Anaanamik annaasaqarnermi inuuneq unittutut misigisimanarsinnaasarpoq. Inuk taanna, amerlasuutigut nammineq inuunermi tunngaviusumik tapersersortaasarsimasoq tassanngaannartumik peeruppoq, amigaateqartutullu misigisimaneq sakkortuutut misigisimanarsinnaalluni. Tapersersortissaqanngitsutut, ikiortissaqanngitsutut aamma oqaloqatissaqanngitsututut misigisimanerit paasinarluarpoq. Kiserliorneq aliasunnermi ajoraluartumik nalinginnaasorujussuuvoq. 

Aliasunneq initoorujussuugaangat inuunermi piffissap aamma siunnerfiup misigineri sunnerneqarsinnaapput. Amerlasuut nunarsuup sinnerata ingerlaqqinnerani soorlu uninngasutut illutik nassuiartarpaat. Tamanna illit kukkusumik iliuuseqarninnik isumaqanngilaq – tamanna illit anaanavit ilinnut qanoq pingaaruteqartigisimaneranik takutitsisuuvoq.  

Iluaqutaasinnaasut ilaat tassaavoq, aliasunnerup kisimiilluni piginnginnissaa. Immaqa illit inuuninnut ilaasumik inoqarpoq alloriarfigilaarsinnaasannik, aammalu initutitavit ilamininnguinilluunniit oqaluttuarfigisinnaasannik. Oqaloqatigiinnerit sivisuujusariaqanngillat – ilaannikkut ima oqaannarluni naammattarpoq: “Artorsaqaanga.” 

Aliasunneq qanoq artornartigisinnaanersoq Aliasoqatini ilisimavarput. Kajumissutsiminnik suleqataasortavut tamarmik toqusoqarneratigut annaasaqarnikuupput, aammalu allanik, aliasunnermik qamannga pisumik paasinnittunik, oqaloqateqarneq qanoq pingaaruteqartigisinnaanersoq ilisimallugu.   

Apeqqutit Akissutillu allaffigeqqinnissaannut tikilluaqqusaasorujussuuvutit, imaluunniit kinaassutsit isertuullugu kajumissutsiminik suleqataasumik chatteqateqarsinnaallutit. Toqusoqarneratigut aliasuuteqarneq pillugu Nuummi, Sisimiuni aamma Qaqortumi qaammammut ataasiarluni naapeqatigiissitsisoqartarpoq. Tassani inuit allat aamma toqusoqarneratigut annaasaqarsimasut, aliasunneq qanoq misigisimanarsinnaanersoq pillugu aamma paasinnissinnaasut, naapissinnaavatit. 

 

Aliasoqatit toqusoqarnerani aliasuuteqartunut neqeroorutaat annertunerusumik uani paasisaqarfigisinnaavatit:

https://aliasoqatit.gl/da/sorgstoette/  

Facebookikkut aamma malinnaaffigisinnaavatsigut https://www.facebook.com/Aliasoqatit?mibextid=LQQJ4d 

Aamma imaassinnaavoq aliasunninni katsorsaanermut tunnganerusutigut ikiorneqarnissat pisariaqartinnerullugu misigisimasutit. Inulerivimmut saaffiginnissinnaavutit, tassani terapeutit aliasunnermik aamma ajornartoornermik misilittagallit sulisorineqarput. Taakku qanoq iliorlutit attaveqarfigisinnaanerlugit uani annertunerusumik paasisaqarfigisinnaavat: https://inulerivik.gl/ 

 

Suut tamaasa massakkorpiaq akissutissaqartittariaqanngilatit. Ullut ataasiakkaarlugit naammappoq. Kisimiinngilatit ❤️ 

Inussiarnersumik inuulluaqqusilluta

Aliasoqatini kajumissutsiminnik suleqatigiit