Aliasunnissaraluara meeraaninni pisimasunit pisinnaajunnaarsinneqarpoq
Aluu.
Ataataga ukiut qulingiluat qaangiupput tassanngaannartumik toqummat, aamma anaanaga kræftimik napparsimareerluni januaarimi toquvoq. 29-nik ukioqarpunga.
Kingorna paasinikuuara meeraallunga isumassuinikkut sumiginnagaasimallunga. Anaanama annaanera suliariniarlugu, aamma meeraanera eqqartorniarlugu tarnip pissusiinik ilisimasalimmut orniguttarnikuuvunga (unitsinnikuuara). Meeraaninni misigisimasama, aamma angajoqqaama sapinngisartik tamaat iliuuseqartarsimanerisa akueriniarnerat massakkut killiffigivara. Kisianni artornarpoq, aamma unittooqqallunga misigisimavunga. Ajornerpaaq tassaavoq, anaanama aliasuutiginissaanut unittooqqatimmanga, naak anaanaga asanerpaanikuusimagaluarlugu, aamma marluulluta pitsaasumik atassuteqarnikuusimagaluarluta.
Qanoq iliussaanga?
Akissut
Asasara Niviarsiaq 29-nik ukiulik
Qanoq iliussalluni pitsaasuussasoq nalunartoq isumaqaravit paasisinnaalluarpakkit.
Ataatat anaanallu annaasimallugit, aamma isumassorneqarnikkut sumiginnagaasimallutit paasisimallugu allapputit. Naak 29-nnarnik ukioqaraluarlutit aliasunneq angisooq misiginikuusimavat.
Tarnip pissusiinik ilimasalimmut orniguttarnikkut ikiortissarsiorsimagavit pitsaasuullunilu sapiitsuliorneruvoq. Paasinarpoq tamanna iluaqutigerujussualereersimagit. Angajoqqaavit sapinngisartik tamaat iliuuseqarniartarsimanerat akuereqqajaallugu allapputit, kisianni anaanavit aliasuutiginissaanut tamatuma unittooqatikkaatit. Tamanna paasisinnaavara. Tassami anaanaq annaasimasaq asasimasarlu aliasuutigineqarsinnaava, ilutigitillugulu pisimasuunikuusimasut pillugit aliasuttorujussuullunilu kamassaqarluni?
Uanga uiga ukiut sisamat matuma siorna annaavara. Allannittut sumiginnarneqarsimaneq misiginikuunngilara, kisianni pereersimasut kingumut eqqarsaatigisarnerat ilisimaarilluarpara. Allatavit uima toqunerani akueriuminaatsitara eqqarsaatigilersippaa, tassalu allanngortitassaanngitsumik tamaanga killeqartoq, suli oqaasissakka oqaatiginagilluunniit, imaluunniit suliarissallugit amigaatigisavut suliarisinnaanagilluunniit tamaanga killeqaannartoq.
Apeqqutit Akissutillu allaffigeqqinnissaanut, imaluunniit Naapeqatigiissitsinerit ilaannut aggernissannut tikilluaqqusaavutit. Ataaniittoq takuuk.
Asannittumik inuulluaqqusillunga,
kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/