Angajoqqaat toqunikuusut
Asasara Apeqqutit Akissutillu,
Arnaavunga inuusuttoq 24-nik ukiulik, angajoqqaakka kræftimik napparsimallutik toqusut ukiut kingulliit arlariit ingerlaneranni annaanikuuakka. Inooqateqarpunga, kisianni ikiorniarlunga saninniissimanngitsoq misigisimavunga. Anaanama annaanissaata tungaanut aamma annaareernerata kingorna angerlarsimassanani allanik ulapputeqaannavissimavoq. Anaanama kræftimik napparsimanera sivikitsuararsuullunilu sakkortoorujussuunikuuvoq. Taamaattumik apeqqutissara tassaavoq, pisumi taamaattumi inooqatigisaq qanoq annertutigisumik piumasaqarfigineqarsinnaanersoq?
Akissut
Asasara illit.
Siullertut oqarusuppunga, angajoqqaatit annaasimagakkit misiginneqatigingaarpakkit.
Allakkat atuarlugu eqqarsaatiginngitsoorsinnaanngilara inooqatigisat nammineq annaasaqarnikuusimanersoq? Aqqusaakkat sakkortoorujussuuvoq, aamma inooqatigisat nammineq annaasaqarluni misiginikuusimanngikkuniuk qanoq innersutit paasiuminaatsissinnaavaa. Inooqatigisat illit pillutit saninniissasoq naatsorsuuteqarnerit paasilluarpara, kisianni nammineq annaasaqarluni misiginikuunngikkuniuk qanoq ikiussanerlutit immaqa naluaa
Uanga nammineq inuuninnit assersuusiorniarlunga, ataatama annaanerata kingorna qaninnerpaarpaatut atassuteqarfigisama ilaasa – inooqatima aamma ikinngutima arnat – qanoq ikiussallunga nalulluinnaraat misigivara. Taamaattumik uannut ikiuutaasut ilaat – aamma suli ikiuutaasoq – tassaavoq, suna atorfissaqartinnerlugu nipituumik oqarfigisarnerat. Taama iliornikkut qaniginerpaasakka pitsaanerusumik uannut ikiuutaasinnaapput, pissutigalugu suna pisariaqartinneriga maanna nalunnginnamikku. Taamaattumik eqqarsaatigivara, suna pisariaqartinnerit, aamma qanoq ikiorsinnaaneraatit pillugu inooqatigisat oqaloqatigigukku immaqa iluaqutaasinnaassasoq?
Ataatama annaanerani aammattaaq misigivara qanigisama ilaasa namminneq pissusertik atorlugu ilungersorlutik ikiorniarsarigaluaraannga, uangali tamanna eqqumaffiginngilara, nammineq sakkortuumik aliasunnera pissutigalugu. Tassunga atatillugu eqqarsaatigivara, nammineq akornassinni immissinnut tapersersoqatigiinnersi qanoq takutittarnerlugu, kiisalu sutigut tapersersorneqarnissarsi immissinnut naatsorsuutiginerlugu oqaluuseralugu misilissagissi, taamaalillusi tamassi immikkut iliuutsisi pillugit immaqa immissinnut paasisinnaaneruniassagassi, kiisalu illuatungerisamut iluaqutaasoq nalunagu sunaasoq iliuuseqartarlusi.
Maanga allakkavit qujanarujussuaq. Neriuppunga eqqarsaatima siunnersuutimalu ilaat arlaatigut atorsinnaassagitit.
Uagutsinnut attaveqaqqinnissannut tikilluaqqusaajuaannarputit. Tusarnaartuaannarpugut.
Asannittumik inuulluaqqusillunga, kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/