Asasarput illit, 

Aliasoqatini Apeqqutit Akissutillu allaffigigakkit qujanaq. Meeqqamik annaasaqarneq artornanngaartoq oqaasertaliiffigissallugu sapiissusermik annertuumik pisariaqartitsiffiusarpoq. Ernerit, aamma aliasunneq atukkat pillugit atukkannik attortittorujussuuvunga. 

Meeqqamik annaasaqarneq – pingaartumik toquneq imminut toqqunnikkut pigaangat – inuunermi tunngavik tamarmi sajuppillatsinneqarsinnaavoq. Aliasunneq nukinnik tamanik tigusisoq amerlasuut misigisarpaat, aamma tunniutiinnaqqajaanerup, suut tamarmik isumaqanngitsutut innerisa aamma kiserliornerup suna tamaat ulikkaartutut ittarlugu. Siunnerfeqanngitsutut nukissaaruttutullu misigisimanerit paasinarluarpoq. 

Aamma tapersersorneqarnak ikiorneqarsimanallu allapputit. Aliasunneq taama angitigisoq kisermaallugu suli artornarneruvoq, aamma tunngavissannik nassaarnissannut ajornakusoornerulersitsimmat paasinarpoq. Kinaluunniit meeqqaminik annaasaqareernermi kingorna kisimiittariaqanngikkaluarpoq. 

Meeqqamik annaasaqarnermi aliasunneq timimut tamarmut aamma ulluinnarni inuunermut sunniuteqarsinnaavoq. Sulinissaq, siunissamut eqqarsarnissaq aamma ullut qaangerniarneri ajornakusuulersinnaapput. Tamanna sanngiinnermik, imaluunniit illit ajoquteqarninnik ersersitsinerunngilaq – tamanna oqimaatsorujussuarmik aamma artornartumik annaasaqarnermi qisuariaataavoq nalinginnaasoq. 

Aliasunnerit kisimiillutit atunnginniassagakku aliasunninnut iluaqutaalaarsinnaasut immaqa ilagisinnaavaat aliasunnerit allanut, tamatuma qanoq misigisimanarneranik ilisimasalinnut, oqaluttuarinissaa. Immaqa oqaloqatigisinnaasannik ilisarisimasaqarputit – imaluunniit ilisarisimanngisannik oqaloqateqarneq immaqa toqqissisimanarnerusinnaavoq.  

Aliasoqatini kajumissutsiminik suliallit, namminneq annaasaqarsimasut, aamma aliasunneq qanoq artornartigisinnaanersoq ilisimasallit, naapissinnaavatit. 

Apeqqutit Akissutillu allaffigeqqinnissaannut tikilluaqqusaajuaannarputit, imaluunnniit kinaassutsit isertuullugu kajumissutsiminik suleqataasumik chatteqateqarsinnaallutit. Toqusoqarneratigut aliasuuteqarneq pillugu Nuummi, Sisimiuni aamma Qaqortumi qaammammut ataasiarluni naapeqatigiissitsisoqartarpoq. Tassani inuit allat aamma toqusoqarneratigut annaasaqarsimasut, aliasunneq qanoq misigisimanarsinnaanersoq pillugu aamma paasinnissinnaasut, naapissinnaavatit. Oqaaseqarnissat pisariaqanngilaq – tusarnaaginnarlutit najuussinnaavutit. 

 

Aliasoqatit toqusoqarnerani aliasuuteqartunut neqeroorutaat annertunerusumik uani paasisaqarfigisinnaavatit:

https://aliasoqatit.gl/da/sorgstoette/  

Facebookikkut aamma malinnaaffigisinnaavatsigut https://www.facebook.com/Aliasoqatit?mibextid=LQQJ4d 

Aamma imaassinnaavoq aliasunninni katsorsaanermut tunnganerusutigut ikiorneqarnissat pisariaqartinnerullugu misigisimasutit. Inulerivimmut saaffiginnissinnaavutit, tassani terapeutit aliasunnermik aamma ajornartoornermik misilittagallit sulisorineqarput. Taakku qanoq iliorlutit attaveqarfigisinnaanerlugit uani annertunerusumik paasisaqarfigisinnaavat: https://inulerivik.gl/ 

 

Misigissutsit sakkortuut amerlasuut piginerini kisimiinnginnavit ilisimassavat, aamma uagutsinnut tamatigut tikilluaqqusaavutit. 

Inussiarnersumik inuulluaqqusilluta

Aliasoqatini kajumissutsiminnik suleqatigiit