Aluu illit,  

Qujanaq allatannut. Qujanaq attavigigatsigut. 

Siullermik misiginneqatigingaarpakkit annaasaqarsimaninni. Ikinngutimik immikornikkut qimagaalluni annernartorujussuusoq nalunngilara, akuersaaruminaatsorlu. Pissusissamisoorporlu misigissutit assigiingitsut aqqusaasallugit, soorlu paattuunganeq, nalornineq immaqalu imminut pisuutinneq.  

Aperivutit qanoq ingerlariaqqisinnaanerlutit – apeqquterujussuuvoq akiuminaatsoq. Akissutissaqanngilarmi naatsumik ersarissumik. Kisimillutit akissutissaq imal. aqqutissat ujartortariaqanngilat. Annaasaqareernerup kingorna aliasuuteqarneq inummiit inummut assigiingittorujusuusinnaavoq. Pingaarnerpaavorli misigissutitit suugaluarnersut inissaqartinnissai: Qianeq, kamanneq, pilluarneq, qujamasunneq, ugguarneq sunaluunniit! Qanoq misigininnut imminut ajorisarniaqinak, suulluuniit misigisinnaaqusaavutit.  

Ilinnut suna pittaanerunersoq paasiniarsinnaavat aliasunninni. Uannut iluaqutaanikuuvoq kammalaatinnik tatigisannik oqaloqateqartarnikkut, kisimiillungalu nipilersukkamik tusarnaarujoorlunga pisuttuarujoornikkut, imal. isikkivik nuannarisannukarlunga issiaarujoorlunga, anersaartorujoorlunga, immaqalu aamma qulliit nakkaatilaarlugit pisariaqartissimagaangakku.  

Neriuppunga illittaaq aamma avatangiisinni tatigisannik oqaloqateqarsinnaasasutit. Pisariaqartitsiguilli kinaasutsit isertuullugu oqaloqateqarnissat aamma periarfissaavoq Tusaannga attavigineratigut. Aliasunnerit kisimiillutit pigiinartariaqanngilat. Kisimiingilagut, nunatsinni amerlaqaagut imminut toqunnikkut annaasaqarsimasugut.  

Piumaguit oqaluttuusinnaavarma, annaasaqareernerup kingorna qanoq issimaninnik. Allaqqinnissannut tikilluaqqungaarpakkit.  

Soqutigigukku aamma chatti-kut allaqateqarsinnaavutit, marlunngornerit tamaasa  Aliasoqatit Chatti ammasarpoq marlunngornerit tamaasa nal. 19:00-imiit 21:00 tungaanut, tassani allaqateqarsinnaavutit toqqaanartumik Aliasoqatini kajumissutsimik suleqataasumiit.  

Taakku marlunngorlugit uani paasisaqarfiginerusinnaavatit: https://aliasoqatit.gl/aliasuuteqarnermi-tapersersoqatigiinneq/

Naapeqatigiissitsinissat tulliit takuniarlugit Facebookikkut malinnaaffigitigut: https://www.facebook.com/Aliasoqatit?mibextid=LQQJ4d 

Ajunnginnissannik kissaatingaarpakkit.  

Inussiarnersumik Aliasoqatit.