Asasarput illit,

 

Aliasoqatini Apeqqutinut akissutinullu allatannut qujanarujussuaq.

Ataatat annaasimagit tusarlugu ajuusaartorujussuuvunga. Angajoqqaamik annaasaqarluni sakkortoorujussuuvoq. Silarsuarmi kisimiittutut misiginarsinnaasorujussuuvoq. Aamma takusinnaavara inuusungaatsiartutit.

Neriuttorujussuuvunga avatangiisinni tapersersorneqartutit, aamma ataatat pillugu oqaloqatigisinnaasannik. Imaluunniit eqqarsaatigiuk immikkut tatigisannik, aamma ataatavit annaareernerata kingorna qanoq innerit pillugu oqaloqatigisinnaasannik inoqarnersoq.

Immaqa angajoqqaaminik annaasaqarluni misigisaqarsimasumik ikinnguteqarlutilluunniit allamik qanigisaqarputit. Aamma immaqa siornatigut oqaloqatigiissutigisimanngisaannaraluarlugu assigiinnik eqqarsaateqarlusilu misigissuseqarlusi misigissagissi qularinngilara. Aamma immissinnut oqaluttuunnersi oqiliallaataassaaq.

Angajoqqaamik annaasaqaraangatta misigissutsit eqqaamasallu amerlasuut initusinnaasarput. Eqqaamasat nuannersut, aammali immaqa eqqaamasat ajornakusoorsinnaasut. Meeqqammi angajoqqaallu akornanni atassuteqarnerit ilaatigut kukkuneqanngilluinnartuuneq ajorput. Aammalu angajoqqaap arlaata annaaneranut atatillugu taakku inittortoorsinnaallutik.

Aliasunnermi misigissutsit nuannersut ajornakusoortullu, tamatta pigisartakkavut, inissaqartissallugit pingaaruteqarpoq.

Qanoq innerlutit, aamma eqqarsaatit suut piginerlugit pillugit allallutit oqaluttuunnissatsinnut aamma tikilluaqqusaangaarputit. Taava tapersersornerusinnaassavatsigit, aammalu uagut nammineq toqusoqarneratigut annaasaqarneq pillugu misilittakkatta ilaannik oqaluttuussinnaassallutit.

Uanga nammineq toqusoqarneratigut annaasaqarnikuuvunga, taamaattumillu nammineq nalunngilara tamanna pillugu allanik oqaloqateqarsinnaaneq qanoq ajornakusoortigisinnaanersoq, aammali aliasunnermi artornartut pillugit oqaluttuarnissatsinnut sapiissuseqaleraangatta qanoq pitsaatigisarnersoq, aliasunnermi kiserliunnginnerulaalersutut misigisimanarsisarmat.

Aliasoqatini kajumissutsimik suleqataasugut tamatta toqusoqarneratigut annaasaqarluta misiginikuuarput. Taamaattumik aliasunneq oqaluuserissallugu sapiissuseqarfigivarput. Aamma qanoq artornartigisoq ilisimavarput. Kisianni aamma aliasunnitta immitsinnut oqaluttuarisinnaanera sapiissuseqarfigileraangatsigu qanoq iluaqutaatigisarnersoq aamma ilisimavarput.

Neriuppunga allaffigeqqissagitsigut, aammalu ataatavit annaaneranut tunngatillugu eqqarsaatitit misigissutitillu oqaluttuarinerulaarlugit, taamaalilluta aliasunninni tapersersorsinnaaniassagatsigit.