Anaanaga anigalugu toqunikuupput
Asasara Apeqqutit Akissutillu,
Atuakkianngorlugu maana allassinnaagaluarpunga, kisianni tamanna isumaagunanngilaq…
Naatsumik oqaluttuarissagaanni anaanaga 1987-imi annaavara. Atuarfimmit soraarlunga angerlarama uanga nassaarivara, taamanikkut 15-inik ukioqarpunga. Matu parnaaqqavoq, allakkallu nakkartitsisarfiatigut takusinnaavara ullaammat ullaakkorsiutaasimasut tamarmik nerriviup qaavaniittut, taamaalillunga ajorluinnartoqartoq tassani nalunngilara.
Anaanama angajoqqaavi illutsinniit 100 miiterisut ungasissusilimmiittumi najugaqarput, taakku immikkut matuersaateqarput, taannalu aavara. Iserpunga, anaanagalu naqqup iluani nassaarivara, anima timmiarsiutaa atorlugu inuunini tamaanga kipisimagaa.
Ukiorpassuit pilluarfiunngitsut ingerlapput. Aniga, uannit ukiunik tallimanik angajulliusoq, anaanattut iliussalluni qinerpaa, ukiullu tallimat qaangiunnerini tunniutiinnarpoq, imminullu aallaalluni.
Anaanaga peerummat ataataga soorunami sequmilluinnarpoq, imigassarlu aalakoornartortalik katsorsaatitut atulerlugu.
Soorunami uannut tunngatillugu ukiorpassuit qaangiutereersimapput, kisianni ilumoorpunga – suut tamarmik uannut ersarilluinnartutut ipput!
Naluara sooq una allannerlugu, kisianni oqaasinnguilluni iluarpoq.
Inussiarnersumik inuulluaqqusillunga
M
Akissut
Asasara M,
Allakkannut qujanaq.
Aallarniutigalu Apeqqutit Akissutillu allaffigigakkit nersualaarusuppakkit. Suli ukiukillutit angisuunik amerlasuunik annaasaqarsimavutit, aamma paasisinnaalluarpara allaganngortinnerat iluaallannertut misigisimanarmat. Sorpiaat aqqusaarsimanerlugit erseqqilluinnartumik takusinnaanngorlugu arlaatigut iluaallannermik nassataqartarpoq.
Uanga nammineq ernera 26-ngajannik ukioqartoq ukiut sisamat matuma siorna annaavara, qatanngutaasalu, piffissami tassani 23-nik aamma 18-inik ukioqartut, qatanngutertik annaavaat. Taamanikkut – sulimi ullumikkut – ilagisinnaajunnaarnera taakkununnga assut sakkortuvoq, maqaasivaat, aammalu ullut tamarluinnaasa eqqarsaatigisarlugu. Takorloorsinnaavara tamanna ilisarisinnaassagit.
Allapputit, anaanavit, anivit aamma ataatavit annaanerannut tunngasut tamarluinnarmik ilinnut ersarilluinnartutut ittut. Uanga aamma taamaappunga. Ernerma toqunerata kingunitsianngua puigornissaa annilaangassutigisorujussuuara, kisianni aatsaat taama uannut ersarinnerulertigaaq. Uannut misigisaq iluarisimaarnartoq tassaasimavoq, inuk annaasaq nammineq inuunermut ilaajuaannartutut, aamma inuunerup sinnerani ilaajuaannartussatut misigisimanera. Asanninnermi tammarneq ajorpoq, naak tamatuma tigussaasortaa peerukkaluartoq. Oqartarnerattut aliasunneq tassaavoq asanninneq angerlarsimaffeqanngitsoq.
Annaasatit inunnut allanut qanoq oqaloqatigiissutigisartigineritit allatanni takusinnaanngilara. Uanga aliasunnerma allanut oqaluttuarisinnaanera uannut pingaartuusimavoq, ilaatigut pissutigalugu oqaluttuassartara oqaluttuarisaqattaassallugu pisariaqartikkakku, aamma ilaatigut pissutigalugu misigissutsit sakkortuut oqaasinngortinnissaat ilikkarlugu iluarmat.
Ikinngutit ilisarisimasallu tamatumunnga atussallugit ilaatigut pisinnaaneq ajorpoq, oqaloqatigiissutit assingi uteqattaartuassallugit taakkununnga qasunarsinnaasarmat, aamma oqaluuserinissaat sooq pisariaqartinneqartuarnersoq paasiuminaasinnaalluni.
Neriuppunga allatama ilaannik ilisarsisinnaassasutit, aamma isummersuutikka immaqa arlaannut atorsinnaassagitit. Isumaqarpunga uagutsinnut saaffiginninnikkut aliasunnerpit ammaaffiginissaa toqqarsimagakku sapiitsuliornerusoq angisooq, siunisannillu pitsaanerpaanik tamanik kissaappakkit.
Aliasunnerit pillugu annaasaqarsimasumik allamik allaqateqarusukkuit Apeqqutit Akissutillu allaffiggeqqissinnaavatit.
Ajunnginnerpaanik tamanik kissaallutit,
kajumissutsimik suleqataasut ilaat
Massakkut ikiorneqarnissannik pisariaqartitsiguit Tusaannga 801180-imut sianerfigisinnaavat, imaluunniit 1899-imut SMS’erlutit.
Ikiortissat allat uani takukkit: https://aliasoqatit.gl/ikiortissanik-allanik-nassaarit/
Aliasoqatit toqusoqarnerani aliasuuteqarneq pillugu naapeqatigiissitsisarnissaannut ulluliussat uani takukkit: https://aliasoqatit.gl/nuummi-naapeqatigiissitsisarnerit/